മസ്കത്ത്: കാരുണ്യത്തിന്‍റെ കരങ്ങൾ ഫലസ്തീനിലെ ജനങ്ങളിലേയ്ക്ക് നീട്ടി ഒമാൻ സുൽത്താനേറ്റ്. ഒമാൻ ചാരിറ്റബിൾ ഓർഗനൈസേഷൻ (ഒ.സി.ഒ) വഴി സംഭാവനകൾ നൽകാമെന്ന് അധികൃതർ അറിയിച്ചു. ഇതിനായി വിവിധ മാർഗ്ഗങ്ങളാണ് ഒ.സി.ഒ ഒരുക്കിയിരിക്കുന്നത്.
ഒനീക്ക് (ഒ.എൻ. ഇ.ഐ.സി) ഓട്ടോമേറ്റഡ് പേയ്‌മെന്റ് മെഷീനുകൾ വഴിയോ ബാങ്ക് അക്കൗണ്ടിലൂടെയോ (ബാങ്ക് മസ്കത്ത്: 0423010869610013, ഒമാൻ അറബ് ബാങ്ക് അക്കൗണ്ട്: 3101006200500) സംഭാവനകൾ നൽകാമെന്ന് ഒ.സി.ഒ വ്യക്തമാക്കി. പൊതുജനങ്ങൾക്ക് ഫോണിൽ നിന്ന് ടെക്സ്റ്റ് മെസേജ് അയച്ചും സംഭാവനയിൽ പങ്കാളിയാകാവുന്നതാണ്. ഒമാൻടെൽ ഉപയോക്താക്കൾക്ക് 90022 എന്ന നമ്പറിലേക്ക് “donate” എന്ന ടൈപ്പ് ചെയ്തും ഉരീദോയിൽ നിന്ന് ‘Palestine’ എന്ന് സന്ദേശത്തിലൂടെയും ഇതിന്റെ ഭാഗമാകാവുന്നതാണ്. www.jood.om, www.oco.org.om എന്ന വെബ്സൈറ്റ് വഴിയും സംഭാവന ചെയ്യാനായി സൗകര്യം ഒരുക്കിയിട്ടുണ്ട്. അതേസമയം, ഫലസ്തീൻ ജനതയോടുള്ള ഒമാന്‍റെ ഐക്യദാർഢ്യം ആവർത്തിച്ച് സുൽത്താൻ ഹൈതം ബിൻ താരിഖ് മന്ത്രിസഭ യോഗത്തിൽ ദിവസങ്ങൾക്ക് മുമ്പ് അറിയിച്ചിരുന്നു.
