മസ്‌കത്ത്: അമേരിക്കൻ പ്രസിഡന്റ് തെരഞ്ഞെടുപ്പിൽ ചരിത്ര വിജയം നേടിയ ഡോണൾഡ് ട്രംപിന് അഭിനന്ദനങ്ങൾ അറിയിച്ച് ഒമാൻ സുൽത്താൻ ഹൈതം ബിൻ താരിക്. ലോകമെമ്പാടുമുള്ള എല്ലാ രാജ്യങ്ങളിലും സമാധാനവും സുസ്ഥിരതയും വ്യാപിപ്പിക്കുന്നതിനുള്ള ശ്രമങ്ങൾ പ്രോത്സാഹിപ്പിക്കുന്നതിനൊപ്പം അമേരിക്കൻ ജനതയെ കൂടുതൽ പുരോഗതിയിലേക്കും ക്ഷേമത്തിലേക്കും നയിക്കുന്നതിൽ ട്രംപ് വിജയിക്കട്ടെയെന്ന് അദ്ദേഹം ആശംസിച്ചു.
നിയുക്ത അമേരിക്കൻ പ്രസിഡന്റ് ഡൊണാൾഡ് ട്രംപിന് തന്റെ ആത്മാർത്ഥമായ അഭിനന്ദനങ്ങൾ അറിയിക്കുന്നുവെന്നും ഒമാൻ സുൽത്താൻ വ്യക്തമാക്കി. ഒമാനും യുഎസും തമ്മിലുള്ള സഹകരണവും നിക്ഷേപ ബന്ധങ്ങളും വർദ്ധിപ്പിക്കാനും കൂടുതൽ പുരോഗതിക്കും വേണ്ടി ഒന്നിച്ച് പ്രവർത്തിക്കാമെന്നും അദ്ദേഹം കൂട്ടിച്ചേർത്തു.
അമേരിക്കയിൽ 127 വർഷത്തിന് ശേഷം ഇതാദ്യമായാണ്, ഒരിക്കൽ തോൽവിയറിഞ്ഞ പ്രസിഡന്റ് വീണ്ടും അധികാരത്തിലെത്തുന്നത്.
