മസ്‌കത്ത്: ഒമാനിലെ ഷിനാസിൽ അൽ ദ്വാനിജ് ബീച്ചിന് സമീപം കരയിലെത്തിയ നീലത്തിമിംഗലത്തെ സുരക്ഷിതമായി കടലിലേക്ക് തിരിച്ചയച്ചു. വടക്കൻ ബാത്തിന പരിസ്ഥിതി അതോറിറ്റിയാണ് ഇക്കാര്യം അറിയിച്ചത്.
തീരത്ത് തിമിംഗലം ഉണ്ടെന്ന് റിപ്പോർട്ട് ലഭിച്ചതിനെത്തുടർന്ന് ഗവർണറേറ്റിലെ പരിസ്ഥിതി വകുപ്പിലെ പ്രത്യേക സംഘങ്ങൾ സ്ഥലത്തെത്തി. തുടർന്ന് ഇവർ നീലത്തിമിംഗലത്തെ സുരക്ഷിതമായി കടലിലേക്ക് തിരിച്ചയക്കുകയായിരുന്നു. വേലിയേറ്റമുണ്ടാകുന്നത് വരെ കാത്തിരുന്നാണ് സംഘം രക്ഷാപ്രവർത്തനം നടത്തിയത്.
ഏകദേശം എട്ട് മീറ്റർ നീളമുള്ള തിമിംഗലമാണ് കരയിലെത്തിയത്. തിമിംഗലത്തിന്റെ സ്വാഭാവിക ആവാസ വ്യവസ്ഥയിലേക്ക് അതിനെ തിരിച്ചെത്തിച്ചതിൽ രക്ഷാപ്രവർത്തകരെ പരിസ്ഥിതി അതോറിറ്റി പ്രശംസിച്ചു.
