മസ്‌കത്ത്: ഒമാന്റെ ദേശീയ ഗതാഗത കമ്പനിയായ മുവാസലാത്ത്, സുസ്ഥിര ഗതാഗത സംവിധാനങ്ങളെ പ്രോത്സാഹിപ്പിക്കുന്നതിന്റെ ഭാഗമായി പ്രഖ്യാപിച്ച ഇലക്ട്രിക് ബസ് റൈഡിനെ പ്രകീർത്തിച്ച് യാത്രക്കാർ. മത്ര റൂട്ട് നമ്പർ നാലിലെ മുവാസലാത്ത് ഇലക്ട്രിക് ബസ് റൂട്ടിനെയാണ് യാത്രക്കാർ ഏറ്റെടുത്തത്. മത്ര കോർണിഷിലേക്കുള്ള ഇലക്ട്രിക് ബസ് യാത്ര കുട്ടികളും മുതിർന്നവരും ഉൾപ്പെടെയുള്ള യാത്രക്കാർ ഒരുപോലെ ആസ്വദിച്ചു. നല്ല തിരക്കായിരുന്നു ബസ്സിൽ അനുഭവപ്പെട്ടത്.
ഇലക്ട്രിക് ബസ്സിൽ മൂന്ന് ദിവസത്തെ സൗജന്യ യാത്ര പ്രഖ്യാപിച്ചിരുന്നു. വെള്ളിയാഴ്ച മുതൽ മൂന്ന് ദിവസത്തേക്ക്, ഉച്ചയ്ക്ക് 2.30 മുതൽ രാത്രി 10 മണി വരെ റൂവി-മത്ര-മസ്‌കത്ത് റൂട്ടിലാണ് ഈ സൗജന്യ യാത്ര ആസ്വദിക്കാൻ കഴിഞ്ഞത്.
പ്രവാസികൾക്കും സഞ്ചാരികൾക്കും ഉൾപ്പെടെ എല്ലാ വിഭാഗം ആളുകൾക്കും ഈ സൗകര്യം പ്രയോജനപ്പെടുത്താൻ അവസരം ഉണ്ടായിരുന്നു.
ഒമാന്റെ 2050-ഓടെ കാർബൺ ബഹിർഗമനം പൂജ്യത്തിലെത്തിക്കുക എന്ന ലക്ഷ്യത്തിന്റെ ഭാഗമായാണ് ഈ നടപടി. കഴിഞ്ഞ ഫെബ്രുവരി മുതൽ മസ്‌കത്തിലെ തിരഞ്ഞെടുക്കപ്പെട്ട റൂട്ടുകളിൽ മുവാസലാത്ത് ഇലക്ട്രിക് ബസുകൾ പരീക്ഷണാടിസ്ഥാനത്തിൽ ഓടിച്ചു തുടങ്ങിയിരുന്നു. 28 യാത്രക്കാരെ ഉൾക്കൊള്ളാൻ കഴിയുന്ന ഈ ബസുകൾ മണിക്കൂറിൽ 70 മുതൽ 130 കിലോമീറ്റർ വരെ വേഗതയിൽ സഞ്ചരിക്കാൻ രൂപകൽപ്പന ചെയ്തവയാണ്. ഇത് നഗര പരിതസ്ഥിതികളിൽ വളരെ അനുയോജ്യമാവുന്നവയാണ്. വിവിധ ഗവർണറേറ്റുകളിലേക്കുള്ള സേവനങ്ങൾ വിപുലീകരിക്കുന്നതുൾപ്പെടെ രാജ്യത്തുടനീളമുള്ള പൊതുഗതാഗതം മെച്ചപ്പെടുത്താനുള്ള നീക്കങ്ങളും മുവാസലാത്ത് ആരംഭിച്ചിട്ടുണ്ട്.
പച്ച നിറത്തിലുള്ള ഈ ഇലക്ട്രിക് ബസുകൾ കാർബൺ രഹിത പരിസ്ഥിതിയെ പ്രതിനിധീകരിക്കുന്നു. സാധാരണ ബസ്സുകളെ അപേക്ഷിച്ച് സീറ്റുകളുടെ എണ്ണം കുറവാണെങ്കിലും യാത്രക്കാർക്ക് വളരെ സൗകര്യപ്രദമായ യാത്രയാണ് ഈ ബസ്സിൽ ലഭിക്കുക.
