മസ്‌കത്ത്: മത്ര കേബിൾ കാർ പദ്ധതിയിലേക്ക് ആദ്യ ബാച്ച് ഉപകരണങ്ങൾ എത്തിച്ചു. ടവറുകൾ, കേബിൾ കാർ എഞ്ചിനുകൾ, അനുബന്ധ വസ്തുക്കൾ തുടങ്ങിയവ ഉൾപ്പെടെയുള്ളവയാണ് എത്തിച്ചത്. ഏകദേശം 26 കണ്ടെയ്‌നറുകളിലായാണ് ഉപകരണങ്ങൾ കൊണ്ടുവന്നതെന്ന് പ്രെജക്ട് ഡെവലപ്പറായ സബീൻ ഇൻവെസ്റ്റ്‌മെന്റ്‌സ് അറിയിച്ചു. വരും മാസങ്ങളിൽ ഇൻസ്റ്റലേഷൻ ജോലികളും ടവർ നിർമ്മാണവും ആരംഭിക്കുമെന്ന് ബന്ധപ്പെട്ട വൃത്തങ്ങൾ വ്യക്തമാക്കി.
അതേസമയം, മത്ര കേബിൾ കാർ പദ്ധതിയുടെ നിർമ്മാണം 71 ശതമാനം പൂർത്തിയായി. അടുത്തവർഷം ആദ്യ പാദത്തിൽ പ്രവർത്തനക്ഷമാകും. ടൂറിസം അനുഭവം മെച്ചപ്പെടുത്തൽ, സാമ്പത്തിക വൈവിധ്യവൽക്കരണം പ്രോത്സാഹിപ്പിക്കൽ, മത്രയിലെ അടിസ്ഥാന സൗകര്യങ്ങൾ നവീകരിക്കൽ തുടങ്ങിയവയാണ് പദ്ധതിയുടെ ലക്ഷ്യം. മത്രയിലെ പ്രധാന വിനോദ സഞ്ചാര കേന്ദ്രങ്ങളെ കോർത്തിണക്കുന്ന ആകാശ സഞ്ചാര യാത്ര സാധ്യമാകുമെന്നതാണ് പ്രധാന പ്രത്യേകത.
കേബിൾ കാർ സർവിസ് ആരംഭിക്കുക മത്ര മത്സ്യ മാർക്കറ്റിന് സമീപമുള സ്റ്റേഷനിൽ നിന്നാണ്. ഇവിടെ നിന്ന് വിനോദ സഞ്ചാരികളെ മലമുകളിലുള്ള രണ്ടാം സ്റ്റേഷനിലേക്ക് കൊണ്ടുപോവും. ഇവിടെ ഇറങ്ങുന്ന സന്ദർശകർക്ക് വിശ്രമിക്കാനും ഫ്‌ലവർ പാർക്ക് സന്ദർശിക്കാനും കഴിയും. കേബിൾ കാർ സർവിസുകൾക്ക് മൂന്ന് സ്റ്റേഷനുകൾ ഉണ്ടായിരിക്കും.
ഒന്നാം സ്റ്റേഷൻ മത്ര മത്സ്യ മാർക്കറ്റിന് സമീപവും രണ്ടാം സ്റ്റേഷൻ റിയാൻ പാർക്കിന് പിന്നിലുള്ള മല മുകളിലുമാണ്. ഇവിടെ മത്രയുടെ കടൽ തീരം മുഴുവൻ കാണാൻ കഴിയും. ഫ്‌ലവർ പാർക്കാണ് മുന്നാം സ്റ്റേഷൻ. പൂന്തോട്ടം, കുട്ടികൾക്കുള്ള അമ്യൂസ്‌മെന്റ് പാർക്ക് എന്നിവയാണ് മലമുകളിലെ സ്റ്റേഷനിൽ ഉണ്ടാവുക. ഫ്‌ലവർ പാർക്കിൽ റസ്റ്റോറൻുകളും ചെറുകിട ഇടത്തരം സ്ഥാപനങ്ങളുടെ ഉൽപന്നങ്ങളുടെ പ്രദർശന ശാലകളും ഉണ്ടാവും.
