മസ്കത്ത്: ഖരീഫ് സീസണിനോടനുബന്ധിച്ച് പുറത്തിറക്കുന്ന വെള്ള നിറത്തിലുള്ള സ്മാരക വാഹന നമ്പർ പ്ലേറ്റുകൾക്കായി ഓൺലൈൻ അപേക്ഷ സമർപ്പിക്കാം. റോയൽ ഒമാൻ പോലീസിന്റെ ഔദ്യോഗിക പോർട്ടലിലൂടെയും മൊബൈൽ ആപ്പിലൂടെയും അപേക്ഷകൾ സമർപ്പിക്കാം. വാഹന ഉടമകൾക്ക് നിലവിലുള്ള രജിസ്ട്രേഷൻ നമ്പർ തന്നെ നിലനിർത്തി പ്രത്യേക പതിപ്പിലുള്ള നമ്പർ പ്ലേറ്റുകൾ ഡിജിറ്റൽ സംവിധാനത്തിലൂടെ സ്വന്തമാക്കാൻ കഴിയും.
പൗരന്മാർക്കും പ്രവാസികൾക്കും നമ്പർ പ്ലേറ്റുകൾക്കായുള്ള അപേക്ഷാ നടപടികൾ എളുപ്പമാക്കാനും സേവന കേന്ദ്രങ്ങളിലെ തിരക്ക് ഒഴിവാക്കാനും വേണ്ടിയാണ് പുതിയ നടപടി. ആപ്പ് ഉപയോഗിച്ച് ലോഗിൻ ചെയ്ത് ‘ഡോക്യുമെന്റ്സ് സർവീസസ്’ വിഭാഗത്തിലേക്ക് പ്രവേശിച്ച്. സ്വന്തം വാഹനം കണ്ടെത്തി ‘റിക്വസ്റ്റ് ദോഫാർ ഖരീഫ് പ്ലേറ്റ്സ്’ എന്ന ഓപ്ഷൻ തിരഞ്ഞെടുക്കണം. വാഹനത്തിന്റെ മുൻവശത്തേക്കും പിൻവശത്തേക്കുമുള്ള പ്ലേറ്റുകളുടെ വലിപ്പം വാഹന തരം അനുസരിച്ച് തിരഞ്ഞെടുക്കാം.
പ്ലേറ്റ് കൈപ്പറ്റാനായി ഇഷ്ടപ്പെട്ട ആർഒപി സേവന കേന്ദ്രം നൽകുകയും ബന്ധപ്പെടാനുള്ള വിവരങ്ങൾ പുതുക്കിയിട്ടുണ്ടെന്ന് ഉറപ്പാക്കുകയും ചെയ്യേണ്ടതാണ്. അതേസമയം, അപേക്ഷ സമർപ്പിക്കുന്നതിന് മുമ്പ് സ്മാരക പ്ലേറ്റുകളുമായി ബന്ധപ്പെട്ട നിബന്ധനകളും വ്യവസ്ഥകളും പരിശോധിച്ച് അംഗീകരിക്കണം. ബാങ്ക് കാർഡ് വിവരങ്ങൾ സുരക്ഷിതമായി നൽകി പണമടക്കാം. അപേക്ഷ അംഗീകരിച്ചതിന് ശേഷം അപേക്ഷകർക്ക് തിരഞ്ഞെടുത്ത സേവന കേന്ദ്രത്തിൽ നിന്ന് പ്ലേറ്റുകൾ ശേഖരിക്കാൻ അറിയിപ്പ് ലഭിക്കും. ഡിസംബർ 31 വരെ മാത്രമായിരിക്കും ഈ പ്രത്യേക സ്മാരക നമ്പർ പ്ലേറ്റുകൾ പ്രാബല്യത്തിലുണ്ടാകുക.
