മസ്‌കത്ത്: ‘ടൂർ ഓഫ് ഒമാൻ’ ദീര്‍ഘദൂര സൈക്ലിങ് മത്സരത്തിന് വർണ്ണശബളമായ തുടക്കം. ബെല്‍ജിയം ടീം അംഗം ടിം മെര്‍ളിയറാണ് ആദ്യ ദിനത്തില്‍ നടന്ന 147.4 കിലോമീറ്റർ മത്സരത്തിൽ വിജയിയായത്. വളരെ ആവേശത്തോടെയാണ് ആരാധകർ മത്സരത്തെ വരവേറ്റത്. മത്സരം കടന്നുപോയ വഴികളിലെല്ലാം നിരവധിപേർ താരങ്ങള്‍ക്ക് പ്രോത്സാഹനവുമായി എത്തിയിരുന്നു. റുസ്താഖ് കോട്ടയില്‍ നിന്ന് ആരംഭിച്ച മത്സരം ഒമാന്‍ കണ്‍വെന്‍ഷന്‍ ആൻഡ് എക്സിബിഷന്‍ സെന്‍ററിലാണ് അവസാനിച്ചത്.
മുഹമ്മദ് ബിൻ അഹമ്മദ്, മാസെൻ ബിൻ സഈദ്, അബ്ദുൽ റഹ്മാൻ, സഈദ് ബിൻ ഇബ്രാഹിം, മോന്ദർ ബിൻ അബ്ദുല്ല, അബ്ദുല്ല ബിൻ മുഹമ്മദ്, ഫൈസൽ ബിൻ സലീം അൽ മാമരി തുടങ്ങിയ ഒമാൻ ദേശീയ ടീമിലെ ഏഴ് റൈഡർമാരും മത്സരത്തിൽ പങ്കെടുത്തിരുന്നു. ഒമാന്‍ നാഷനല്‍ ടീം ഉള്‍പ്പെടെ 18 ടീമുകള്‍ ഇത്തവണ മത്സരത്തിനുള്ളത്. ആകെ മത്സര ദൂരം 830 കിലോമീറ്ററാണ്.
