മസ്‌കത്ത്: അസീബിലെ അൽ സലാം സ്ട്രീറ്റ് നവീകരിക്കുന്നതിനുള്ള കരാറിൽ ഒപ്പുവെച്ച് മസ്‌കത്ത് മുനിസിപ്പാലിറ്റി. മസ്‌കത്ത് ഗവർണറേറ്റിലെ റോഡ്, അടിസ്ഥാന സൗകര്യ സംവിധാനം വികസിപ്പിക്കുന്നതിനും, സുപ്രധാന സ്ഥലങ്ങളിലെ ഗതാഗതക്കുരുക്ക് പരിഹരിക്കുന്നതിന് സുസ്ഥിരമായ ഗതാഗത പരിഹാരങ്ങൾ കണ്ടെത്താനും നഗര വികാസത്തിനും ഗതാഗത വ്യാപ്തത്തിൽ പ്രതീക്ഷിക്കുന്ന വർദ്ധനവിനും അനുസൃതമായി റോഡിന്റെ ശേഷി വർദ്ധിപ്പിക്കുന്നതിനുമുള്ള മുനിസിപ്പാലിറ്റിയുടെ ശ്രമങ്ങളുടെ ഭാഗമായാണ് നടപടി. എസെഡ് എഞ്ചിനീയർമാരുമായും പങ്കാളികളുമായുമാണ് മസ്‌കത്ത് മുൻസിപ്പാലിറ്റി കരാറിൽ ഒപ്പുവെച്ചത്.
അൽ സലാം സ്ട്രീറ്റിൽ ഉയർന്ന ഗതാഗത സാന്ദ്രത അനുഭവപ്പെടുന്ന രണ്ട് സുപ്രധാന സ്ഥലങ്ങളെയാണ് പദ്ധതി ലക്ഷ്യമിടുന്നത്. പദ്ധതിയുടെ ഭാഗമായി ഇന്റർസെക്ഷനുകൾ വികസിപ്പിക്കുകയും അവയുടെ ശേഷി വർദ്ധിപ്പിക്കുകയും ചെയ്യുന്നു. ഇത് ഗതാഗത തിരക്ക് കുറയ്ക്കാനും പ്രദേശത്തെ ഗതാഗത കാര്യക്ഷമതയും സുരക്ഷാ നിലവാരവും മെച്ചപ്പെടുത്തുന്നതിനും സഹായിക്കുന്നു.
രണ്ട് വരി മേൽപ്പാലങ്ങളുടെ നിർമ്മാണം, ആവശ്യമായ പ്രവേശന, എക്‌സിറ്റ് പോയിന്റുകൾ ഒരുക്കൽ, കവലയുമായി ബന്ധിപ്പിച്ചിരിക്കുന്ന റോഡുകളുടെ നവീകരണം തുടങ്ങിയവയെല്ലാം നവീകരണ പ്രവർത്തനങ്ങളിൽ ഉൾപ്പെടുന്നു. അൽ സലാം സ്ട്രീറ്റിനും അൽ ഖൈർ സ്ട്രീറ്റിനും ഇടയിലുള്ള ട്രാഫിക് ലൈറ്റ് ഇന്റർസെക്ഷൻ നവീകരിക്കുകയും അൽ സലാം സ്ട്രീറ്റിൽ ഓരോ ദിശയിലും രണ്ട് വരികളായി ഒരു തുരങ്കം നിർമ്മിക്കുകയും ഭാവിയിൽ മൂന്നാം പാതയ്ക്കായി അധിക സ്ഥലം അനുവദിക്കുകയും ചെയ്യുന്നു. രണ്ട് വരി ഓവർപാസുകളുടെ നിർമ്മാണവും സ്വതന്ത്രമായി ഒഴുകുന്ന ടേണിംഗ് പാതകളും വികസനത്തിൽ ഉൾപ്പെടുന്നുണ്ട്.
