മസ്‌കത്ത്: ഒമാനിൽ വിവാഹപൂർവ മെഡിക്കൽ സ്‌ക്രീനിംഗ് സർട്ടിഫിക്കറ്റുകൾക്ക് പരിശോധനാ തീയതി മുതൽ ആറ് മാസത്തേക്ക് സാധുതയുണ്ടെന്ന് ആരോഗ്യ മന്ത്രാലയം. അതിനുശേഷം സാധുത കാലയളവിനുള്ളിൽ വിവാഹ നടപടിക്രമങ്ങൾ പൂർത്തിയാക്കിയിട്ടില്ലെങ്കിൽ പരിശോധന ആവർത്തിക്കണം.
പരിശോധനാ ഫലങ്ങൾ ലഭ്യമാകുകയും ഇരു കക്ഷികൾക്കും ആവശ്യമായ മെഡിക്കൽ കൺസൾട്ടേഷൻ ലഭിക്കുകയും ചെയ്തതിന് ശേഷം സർട്ടിഫിക്കറ്റ് നൽകുമെന്ന് ആരോഗ്യ മന്ത്രാലയം അറിയിച്ചു. സുൽത്താനേറ്റിനകത്തോ പുറത്തോ വിവാഹം കഴിക്കാൻ പദ്ധതിയിടുന്ന ഒമാനികൾക്കും, ഒമാനി പൗരന്മാരെ വിവാഹം കഴിക്കാൻ ഉദ്ദേശിക്കുന്ന പ്രവാസികൾക്കും, വിവാഹം എവിടെ നടന്നാലും ഈ സ്‌ക്രീനിംഗ് ബാധകമാണ്.
സർട്ടിഫിക്കറ്റിൽ ഒരു റഫറൻസ് നമ്പർ, ഇഷ്യൂ ചെയ്യുന്ന ആരോഗ്യ സ്ഥാപനത്തിന്റെ വിശദാംശങ്ങൾ, കാലാവധി അവസാനിക്കുന്ന തീയതി, വ്യക്തിഗത വിവരങ്ങൾ എന്നിവ ഉൾപ്പെടുന്നു. വിവാഹത്തിന് മുമ്പ് ദമ്പതികൾക്ക് അവരുടെ ആരോഗ്യസ്ഥിതി മനസ്സിലാക്കാനും, ആരോഗ്യപരമായ ആശങ്കകൾ തിരിച്ചറിയാനും, വൈദ്യോപദേശം തേടാനും സ്‌ക്രീനിംഗ് സഹായിക്കുമെന്ന് മന്ത്രാലയം കൂട്ടിച്ചേർത്തു.
