മസ്കറ്റ്: ഒമാൻ എയർ ഈ മാസം 30-ാം വാർഷികം ആഘോഷിക്കുന്നു. 1993 മാർച്ചിൽ മസ്‌കറ്റിനും സലാലയ്ക്കും ഇടയിൽ ഒരൊറ്റ വിമാന സർവീസിലൂടെയാണ് ഒമാൻ എയർ യാത്രയ്ക്ക് തുടക്കം കുറിച്ചത്. ബോയിംഗ് 737-300 ലൂടെയാണ് എയർലൈനിന്റെ ആദ്യ ആഭ്യന്തര ശൃംഖല മസ്‌കറ്റിനും ദുബായിക്കും ഇടയിൽ ഔദ്യോഗികമായി ആരംഭിച്ചത്.
കഴിഞ്ഞ മൂന്ന് പതിറ്റാണ്ടുകളായി, എയർലൈൻ വളർച്ചയിൽ നിന്ന് വളർച്ചയിലേക്ക് സഞ്ചരിക്കുകയാണ്. ഇപ്പോൾ യൂറോപ്പിലേക്കും ഫാർ ഈസ്റ്റിലേക്കും 45 ലധികം ലക്ഷ്യസ്ഥാനങ്ങളിലേക്ക് യാത്ര ചെയ്യുന്നുണ്ട്. ശക്തമായ അന്തർദേശീയ സാന്നിധ്യവും ഉയർന്ന നിലവാരമുള്ള ഉൽപ്പന്നങ്ങളും മികച്ച ഉപഭോക്തൃ സേവനവും പ്രദാനം ചെയ്യുന്നതിലൂടെയാണ് ഒമാൻ എയർ പ്രശസ്തി നേടിയത്.
ഒമാന്റെ ദേശീയ വിമാനക്കമ്പനിയെന്ന നിലയിൽ മുപ്പത് വർഷം എന്നത് അഭിമാനിക്കാവുന്ന ഒരു നാഴികക്കല്ലാണെന്ന് ഒമാൻ എയർ ചീഫ് എക്‌സിക്യൂട്ടീവ് ഓഫീസർ അബ്ദുൽ അസീസ് അൽ റയ്‌സി പറഞ്ഞു. അക്കാലത്ത്, രാജ്യത്തുടനീളമുള്ള ഒമാനികളെ ബന്ധിപ്പിക്കുന്ന ഒരു ചെറിയ പ്രാദേശിക വിമാനക്കമ്പനിയിൽ നിന്ന് ലോകമെമ്പാടുമുള്ള സന്ദർശകരെ ഒമാന്റെ വൈവിധ്യമാർന്ന പ്രകൃതി സൗന്ദര്യത്തിലേക്കും സമ്പന്നമായ സംസ്കാരത്തിലേക്കും ബന്ധിപ്പിക്കുന്ന അവാർഡ് നേടിയ എയർലൈനായി ഒമാൻ എയർ വളർന്നതായും അദ്ദേഹം കൂട്ടിച്ചേർത്തു.
