മസ്കത്ത്: എൽപിജി സിലണ്ടറുകൾ നിറയ്ക്കുന്നതിനും വിൽക്കുന്നതിനുമുള്ള പുതിയ സ്റ്റേഷനുകൾ സ്ഥാപിക്കുന്നതിനുള്ള എല്ലാ അപേക്ഷകളും താത്ക്കാലികമായി നിർത്തിവെച്ചതായി ഒമാൻ വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയം.
നിലവിലെ വിപണി ആവശ്യങ്ങളും നിയന്ത്രണ ചട്ടക്കൂടുകളും അധികൃതർ അവലോകനം ചെയ്യുന്നതിനാൽ സുൽത്താനേറ്റിലെ എല്ലാ ഗവർണറേറ്റുകളിലും ഈ തീരുമാനം ബാധകമാണ്. ഈ മേഖലയിലെ ഭാവി നിക്ഷേപ അവസരങ്ങൾ ആവശ്യാനുസരണം വീണ്ടും അവതരിപ്പിക്കുമെന്നും, എല്ലാ പുതിയ പദ്ധതികളും പുതുക്കിയ ചട്ടങ്ങൾക്കും നടപടിക്രമ നിയന്ത്രണങ്ങൾക്കും അനുസൃതമാണെന്ന് ഉറപ്പാക്കുമെന്നും മന്ത്രാലയം വ്യക്തമാക്കി. ബാധകമായ നിയമങ്ങൾക്കനുസൃതമായി രാജ്യത്തുടനീളമുള്ള ഗ്യാസ് വിതരണ സേവനങ്ങളുടെ ഉയർന്ന നിലവാരവും ഫലപ്രദമായ മാനേജ്മെന്റും നിലനിർത്തുന്നതിനാണ് ഈ നീക്കം.
