മസ്കത്ത്: ഒമാനിൽ അൽ മുഗ്സൈൽ റോഡിന്റെയും പാലത്തിന്റെയും നിർമ്മാണ പദ്ധതി 85% പൂർത്തിയായി. 2026 ജൂലൈ ആദ്യം റോഡിലൂടെയും പാലത്തിലൂടെയുമുള്ള ഗതാഗതം തുറക്കുമെന്നാണ് പ്രതീക്ഷിക്കുന്നത്. ദോഫാർ ഗവർണറേറ്റിലെ ഗതാഗതം മെച്ചപ്പെടുത്തുകയും പ്രധാന വിനോദസഞ്ചാര കേന്ദ്രങ്ങളിലേക്കുള്ള പ്രവേശനം വർദ്ധിപ്പിക്കുകയും ലോജിസ്റ്റിക്കൽ കണക്റ്റിവിറ്റി ശക്തിപ്പെടുത്തുകയും ചെയ്യും.
ഗവർണറേറ്റിന്റെ റോഡ് ശൃംഖലയ്ക്ക് ഗുണപരമായ സംഭാവന നൽകുന്നതിനാൽ മന്ത്രാലയം പ്രത്യേക ശ്രദ്ധ ചെലുത്തിയിട്ടുള്ള സുപ്രധാന സംരംഭങ്ങളിൽ ഒന്നാണ് അൽ മുഗ്സൈൽ റോഡ് ആൻഡ് ബ്രിഡ്ജ് പദ്ധതിയെന്ന് ഗതാഗത, വാർത്താവിനിമയ, വിവര സാങ്കേതിക മന്ത്രാലയം അണ്ടർ സെക്രട്ടറി എഞ്ചിനീയർ ഖാമിസ് മുഹമ്മദ് അൽ ഷമ്മാഖി പറഞ്ഞു.
പദ്ധതിയിൽ ഏകദേശം 500 മീറ്റർ നീളമുള്ള കോൺക്രീറ്റ് പാലവും ഉൾപ്പെടുന്നു. ഒമാൻ സുൽത്താനേറ്റിന്റെ റോഡ് ഡിസൈൻ മാനുവലിന്റെ സ്റ്റാൻഡേർഡ് സ്പെസിഫിക്കേഷനുകൾക്കനുസൃതമായി ദിശാസൂചന ചിഹ്നങ്ങൾ, മുന്നറിയിപ്പ് അടയാളങ്ങൾ എന്നിവയുൾപ്പെടെ എല്ലാ ഗതാഗത സുരക്ഷാ ആവശ്യകതകളും റോഡരികിൽ സജ്ജമാക്കിയിട്ടുണ്ട്. റോഡരികിലെ പാർക്കിംഗ് ഏരിയകളും 2 മുതൽ 7 മീറ്റർ വരെ വീതിയുള്ള വെളിച്ചമുള്ള നടപ്പാതയും പദ്ധതിയിൽ ഉൾപ്പെടുന്നുവെന്ന് അദ്ദേഹം കൂട്ടിച്ചേർത്തു.
