മസ്കത്ത്: സാഹസിക വിനോദസഞ്ചാരികൾക്കും ഔട്ട്ഡോർ പ്രേമികൾക്കും വേണ്ടിയുള്ള സുരക്ഷാ മാർഗ്ഗനിർദ്ദേശങ്ങൾ പുറപ്പെടുവിച്ച് സിവിൽ ഡിഫൻസ് ആൻഡ് ആംബുലൻസ് അതോറിറ്റി. നാഷണൽ റിസ്ക് രജിസ്റ്ററുമായി സഹകരിച്ചാണ് മാർഗനിർദ്ദേശങ്ങൾ പുറത്തിറക്കിയിരിക്കുന്നത്. യാത്രകൾ ആരംഭിക്കുന്നതിന് മുമ്പ് ശ്രദ്ധാപൂർവ്വം തയ്യാറെടുക്കണമെന്ന് അധികൃതർ വ്യക്തമാക്കി. ഹൈക്കിംഗ്, സാഹസിക ടൂറിസം പ്രവർത്തനങ്ങൾ എന്നിവയിലെ അപകടസാധ്യതകൾ കുറയ്ക്കുന്നതിന് മുൻകൂട്ടി ആസൂത്രണം ചെയ്യേണ്ടതിന്റെയും അംഗീകൃത സുരക്ഷാ നടപടികൾ പാലിക്കേണ്ടതിന്റെയും പ്രാധാന്യം അധികൃതർ ഉയർത്തിക്കാട്ടി.
സുരക്ഷിതവും സുസംഘടിതവുമായ യാത്രകൾ ഉറപ്പാക്കാൻ ലൈസൻസുള്ള സാഹസിക ടൂറിസം കമ്പനികളെയും സാക്ഷ്യപ്പെടുത്തിയ ഗൈഡുകളെയും തിരഞ്ഞെടുക്കുക. അംഗീകൃത റൂട്ടുകളിൽ വേണം സഞ്ചാരം നടത്തേണ്ടത്. യാത്രാ പദ്ധതികളെക്കുറിച്ച് മറ്റുള്ളവരെ അറിയിക്കണം. അവശ്യ സുരക്ഷാ ഉപകരണങ്ങളും വിശ്വസനീയമായ ആശയവിനിമയ മാർഗങ്ങളും കരുതുക.
വഴി തെറ്റിയാൽ ശാന്തത പാലിക്കുക. സുരക്ഷിതമായ സ്ഥലത്ത് തുടരുക. ഉടൻ തന്നെ ബന്ധപ്പെട്ട അധികാരികളെയോ അവരുടെ ഗൈഡിനെയോ ബന്ധപ്പെടുക, ലക്ഷ്യമില്ലാതെ അലഞ്ഞുതിരിയുന്നത് ഒഴിവാക്കുക. യാത്രകൾ കൃത്യമായി ആസൂത്രണം ചെയ്തിട്ടുണ്ടെന്ന് ഉറപ്പാക്കണം. ലൈസൻസുള്ള ഗൈഡുകൾക്ക് അപകടസാധ്യതകൾ വിലയിരുത്തുന്നതിനും അംഗീകൃത പാതകളിലൂടെ സഞ്ചരിക്കുന്നതിനും അടിയന്തര സാഹചര്യങ്ങളോട് ഫലപ്രദമായി പ്രതികരിക്കുന്നതിനുമുള്ള അറിവും വൈദഗ്ധ്യവും ഉണ്ടെന്നും അധികൃതർ ചൂണ്ടിക്കാട്ടി.
അടിയന്തര സാഹചര്യങ്ങളിൽ, സഹായം അഭ്യർത്ഥിക്കുന്നതിനും ലൊക്കേഷൻ വേഗത്തിൽ പങ്കിടുന്നതിനും 9999 എന്ന നമ്പറിൽ വിളിക്കുകയോ ‘നിദ’ അടിയന്തര ആപ്ലിക്കേഷൻ ഉപയോഗിക്കുകയോ ചെയ്യണമെന്നും അധികൃതർ കൂട്ടിച്ചേർത്തു.
