റിയാദ്: സൗദി അറേബ്യ ആതിഥേയത്വം വഹിക്കുന്ന അന്താരാഷ്ട്ര സാമൂഹിക ഉത്തരവാദിത്ത ഫോറത്തിന്റെ രണ്ടാം പതിപ്പിൽ പങ്കെടുത്ത് ഒമാൻ. റിയാദിൽ വെച്ചാണ് ഫോറം നടക്കുന്നത്. ‘പ്രതിബദ്ധതയിൽ നിന്ന് സ്വാധീനത്തിലേക്ക്’ എന്ന വിഷയത്തിൽ നടക്കുന്ന ഫോറം രണ്ട് ദിവസം തുടരും.
സാമൂഹിക വികസന മന്ത്രി ഡോ. ലൈല ബിൻത് അഹമ്മദ് അൽ നജ്ജാർ ആണ് ഫോറത്തിലെ ഒമാൻ പ്രതിനിധി സംഘത്തെ നയിക്കുന്നത്. അന്താരാഷ്ട്ര അനുഭവങ്ങളും സാമൂഹിക ഉത്തരവാദിത്തത്തിലെ മികച്ച രീതികളും ഫോറത്തിൽ ഉൾപ്പെടുത്തിയിട്ടുണ്ട്. സർക്കാർ, സ്വകാര്യ, ലാഭേച്ഛയില്ലാത്ത മേഖലകൾക്കിടയിൽ സുസ്ഥിരതയെ പിന്തുണയ്ക്കുന്നതിലും പങ്കാളിത്തം വളർത്തുന്നതിലും സാമൂഹിക ഉത്തരവാദിത്തത്തിന്റെ പങ്കിനെക്കുറിച്ചും ഫോറത്തിൽ ചർച്ച ചെയ്യും. വിദ്യാഭ്യാസവും വികസനവും ശാക്തീകരിക്കുന്നതിലും, വിവിധ മേഖലകളിൽ ഫലപ്രദമായ പങ്കാളിത്തം വികസിപ്പിക്കുന്നതിലും, സുസ്ഥിര ബിസിനസുകളുടെ വളർച്ച ത്വരിതപ്പെടുത്തുന്നതിലും, മനുഷ്യരാശിക്ക് പരമാവധി നേട്ടങ്ങൾ കൈവരിക്കുന്നതിന് ഡിജിറ്റൽ പരിവർത്തനത്തിന്റെയും കൃത്രിമബുദ്ധിയുടെയും ഉപയോഗം എന്നിവയിൽ ആഗോളതലത്തിൽ സാമൂഹിക ഉത്തരവാദിത്തത്തിന്റെ പങ്ക് ഫോറത്തിന്റെ സെഷനുകൾ അടിവരയിടുന്നു.
